Tigsik ko an mga mag-bata

Tigsik ko an mga mag-bata
Kun magpadangat sobra-sobra
Kulang na lang mag-agoman na
Asin tumangan su mga nagkokontra.

Tigsik ko an saindang lambingan
Sa gilid kan tinampo nagkukurudutan
Hadok sa liog, hadok duman
Biyong ayahay an namamatean.

Tigsik ko ining si Maria
Igot-igot magka igwang bata
Patago-tago pa sa saiyang ina
Nadakop man sana kan istrikto niyang ama.

Tigsik ko an saindang mga pasali
Pag-abot kan aldaw, saro-sarong mahiribi
Sa sobrang hisdol siguradong madadali
Umboy an dara-dara pagpuli.

Si Ma'am!

Tigsik ko ining sarong maestra
Pasimple kun sya mina-rampa
Sa inuman man o kun saen pa
Maisihan mo, burat burat na.

Tigsik ko an saiyang pa-kyeme
Daing patawad dawa na sa estudyante
Haralipot na palda kun saen baga hale
Hilinga na baya an saiyang kustumbre.

Tigsik ko ining sarong soltero
Dawa hugakon pirming pasado
Sa maestrang ini sya minaasenso
Huli kan pandok na iyong gayo si Piolo.

Tigsik ko an pagsulnop kan saldang
Sa kadikloman minalayog an sundang
Ining maestra daing respeto sa gurang
Makalayas sana, siguradong matumang.

Tigsik ko an aldaw na Viernes
An tambayan duman sa Quince Martires
Matinar abot maagahon nin Alas-Tres
Kaiba an saiyang mga alipores.

Sana naging si St. Ignatius na lang ako, itong istatwa sa Ateneo.

Sana naging si St. Ignatius na lang ako, itong istatwa sa Ateneo. Dawa pirang taon nang nakaluhod, kapot-kapot an saiyang espada, isi kong nunca siyang mapapagal. Dai nakakamating gutom. Dai nakakamating kulog. Mayo na siyang pusong nakukulgan kundi purong semento na sana an kapanoan kan saiyang hawak. Pusog nang marhay. Sana ako na lang siya para dai ko na namamati an kulog. Kulog na nag-aprubitsar sa sakong pagmondo... sa sakong paghibi... ngunyan... saaga... Pusong naghihinagdan. Puso na namomoot. Pusong makapoy sa pagpadangat. Sana istatwa na sana ako para dai ko na namamati ining kulog na padikit-dikit akong ginagadan... tinutunaw an sakong pagkayaon. Habo ko nang mamoot. Mapagal. 

Ika na sana

Minarayo sa sakuyang paghiling. Dai ko na mamaanan. Dai na abot kan sakong pagdangog. Dai ko na baga maisihan. Pa’no ika nagba’go na. Ba’go nang marhay, dai ko na mamidbiran huli kan saimong buhok na ngunyan bulawan na. Urog na maayahay pang pagta’nawon kaysa sa mga bituon. Ako uya sana. Su buhok na kasing latom kan oring mas minagla’tom pa huli ta saimo na sana an gabos na kaogmahan. Ika na sana an paladan. Ika na sana an marhay.

Kita. Duwa. Maogma.

Kita, uya, namumuya

Sa taid ko ika maogma

Pagkiling ko sa wala

Ngisi abot talinga.

Duwa kitang namomoot

Dukutan satong mga kamot

Ikurahaw satong pagkamoot

Parong kan duros mahamot.

Maogma an aldaw ta

Saldang magaya-gaya sa mata

Sinimbag mga kahapotan ta

Pag-ako kan kada saro satuya.

Kita. Duwa. Maogma.

Siniselebrar satong presensiya

Nahiling ta na, kabu-tan ta’ng duwa

Kapot an rosaryo, kita masimba.

Ako. Saro. Mamundo.

Ako namumundo

Mayo ka sa taid ko

Pagkiling ko sa to-o

Duros an minaako.

Saro sana an minama-wot

Madu-tan si-mong kamot

Ikurahaw sakong pagkamoot

Dawa sa duros’na nakakapot.

Mamundo an aldaw ko

Saldang nalingaw magsirang sa payo

Simbaga man an kahapotan ko

Sako daw makukua an pag-ako mo?

Ako. Saro. Mamundo.

Italbong sa daga panua nin gapo

Kun mahiling mo man kabu-tan ko

Kaluta ako, sa-bitan nin rosaryo.

Atyan, duruga ako

Ako an dios mo, tubuda ako.

An sugo ko an masalvar saimo,

An lawas ko maduta sa lawas mo,

An ngabil mo, nanamitan ko.

Napapaha ako.

Baribiha ako kan si-mong laway

Na papaturuon sa entero kong hawak.

Bahuga ako kan si-mong laman.

Uya ako. Daeng untok na

Minimidbid an ngaran mo.

Hubai ako kan libog mo

Basuga ako kan init mo.

Atyan, duruga ako, suruguon ko.

Makintid gabos na bitis

Panganuron mahinagdan, makakaptan

Mga bituon maluhod 

Huli kan sakong agrangay.

Duruga ako, ika ngunyan pagrurugaring ko.

Apuda gabos na santo

Matea baya an pangapudan ko

Hil'nga an pangiturugan mong paraiso.